2026 жылғы 24–26 маусым аралығында «Д. Қонаев атындағы аграрлық-техникалық колледжі» мемлекеттік коммуналдық қазыналық кәсіпорнында 07161300 – «Автомобиль көлігіне техникалық қызмет көрсету, жөндеу және пайдалану» мамандығы бойынша білім алатын Автослесарь 9-232 тобының студенттері 3W07161303 – «Автомобиль көлігін жөндеу шебері» біліктілігі бойынша қорытынды демонстрациялық емтихан тапсырды.
Демонстрациялық емтихан CIS (Competence Information System) бағалау жүйесі негізінде ұйымдастырылып, WorldSkills халықаралық стандарттарының талаптарына сәйкес өткізілді. Бұл бағалау форматы студенттердің кәсіби құзыреттіліктерін өндірістегі нақты жұмыс жағдайына барынша жақын ортада бағалауға мүмкіндік береді. Сонымен қатар білім алушылардың теориялық білімін тәжірибемен ұштастырып, кәсіби даярлығы мен практикалық шеберлігін жан-жақты бағалауға бағытталған.
Емтихан үш негізгі модуль бойынша өткізілді:
- Daewoo Nexia автокөлігінің қозғалтқышын бөлшектеу және қайта жинау;
- Беріліс қорабын бөлшектеу және жинау;
- FSA 740 диагностикалық кешені мен FCAR сканері арқылы автомобильдің электрондық басқару жүйелеріне диагностика жүргізу.
Үш күнге созылған емтихан барысында студенттер автокөлік қозғалтқышы мен агрегаттарын бөлшектеу және қайта жинау жұмыстарын орындап, электрондық басқару жүйелеріндегі ақауларды заманауи диагностикалық құралдардың көмегімен анықтап, оларды жою бойынша практикалық тапсырмаларды сәтті орындады. Сонымен қатар техникалық қызмет көрсету және жөндеу жұмыстарын жүргізу кезінде арнайы құрал-жабдықтарды тиімді пайдаланып, еңбек қауіпсіздігі талаптарын толық сақтай білді.
Демонстрациялық емтиханға тәуелсіз сарапшылар мен бағалау комиссиясының мүшелері қатысып, студенттердің кәсіби даярлығын, техникалық сауаттылығын, жұмысты орындау сапасын, уақытты тиімді пайдалануын, өндірістік мәдениетін және практикалық машықтарын кешенді түрде бағалады.
Бағалау нәтижелері бойынша Автослесарь 9-232 тобының студенттері кәсіби білімдері мен тәжірибелік дағдыларының жоғары деңгейде қалыптасқанын көрсетті. Олар өндірістік міндеттерді өз бетінше орындауға, заманауи диагностикалық жабдықтармен жұмыс істеуге және автомобиль көлігіне техникалық қызмет көрсету мен жөндеу саласында еңбек етуге толық дайын екендіктерін дәлелдеді.
Қорытынды демонстрациялық емтихан – студенттердің оқу барысында меңгерген теориялық білімдері мен өндірістік тәжірибесінің нәтижесін айқындайтын маңызды кезең. Мұндай бағалау жүйесі еңбек нарығының сұранысына сай, кәсіби құзыреттілігі жоғары, бәсекеге қабілетті мамандарды даярлауға мүмкіндік береді.
«Д. Қонаев атындағы аграрлық-техникалық колледжі» ұжымы Автослесарь 9-232 тобының студенттерін қорытынды демонстрациялық емтиханды сәтті аяқтауларымен құттықтап, алдағы кәсіби қызметтеріне мол табыс, жаңа жетістіктер мен жарқын болашақ тілейді!
