Мен, Д.Қонаев атындағы аграрлық техникалық колледжінің информатика пәнінің оқытушысы Зиябеков Хаётулло Моминжанович, «Информатика сабағында жобалық оқыту әдістерін қолдану» тақырыбында өз тәжірибеммен бөлісуді жөн көрдім. Бүгінгі таңда білім беру үдерісі жаңаша бағыт алып, дәстүрлі тәсілдер заманауи әдістермен алмастырылуда. Соның ішінде жобалық оқыту әдісі – студенттің білімге деген қызығушылығын оятып, оны өз бетінше ізденуге, нақты нәтижеге бағыттауға мүмкіндік беретін тиімді тәсілдердің бірі.
Информатика сабағында жобалық әдісті қолдану арқылы студенттер нақты тапсырмаларды орындау барысында теориялық білімдерін іс жүзінде бекітіп, шығармашылықпен жұмыс істеуге дағдыланады. Бұл әдістің ерекшелігі – әрбір студент өз жобасын жоспарлап, оны кезең-кезеңімен іске асырып, соңында нақты нәтиже ұсына алады. Мұндай тәсіл студенттің бойындағы жауапкершілік, ұйымдастырушылық, командада жұмыс істеу және ақпараттық технологияларды еркін пайдалану қабілеттерін дамытады.
Мысалы, менің тәжірибемде «Менің алғашқы сайтым», «Ақпараттық жүйе жобалау», «Scratch арқылы анимациялық жоба құру» секілді жобалар сәтті жүзеге асырылуда. Бұл жобалар студенттерді белсенділікке баулиды, олардың логикалық ойлауын және креативті көзқарасын дамытуға ықпал етеді. Жоба барысында студенттер ақпаратты жинақтап, оны өңдеп, нақты өнім – жоба нәтижесін ұсынады.
Жобалық оқыту барысында мен студенттерге бағыт-бағдар беріп, олардың дербес жұмыс жасауына мүмкіндік жасаймын. Мұндай ортада студент өзін жай ғана тыңдаушы емес, белсенді зерттеуші ретінде сезінеді. Бұл тәсілдің тағы бір артықшылығы – әр студент өз қабілеті мен қызығушылығына қарай жұмыс істей алады, яғни даралап оқыту принципі жүзеге асады.
Қорытындылай келе, жобалық оқыту әдісін информатика сабағында қолдану – студенттің тек білім алып қана қоймай, оны өмірде қолдана білуге, жаңашылдыққа, жауапкершілікке және өз ойын еркін жеткізуге тәрбиелейді. Болашақта да осы әдісті жетілдіріп, білім сапасын арттыру бағытында жұмыс жасауды жалғастыра беремін.