Мен, Сидигалиева Шахноза Акмалжановна, Д. Қонаев атындағы аграрлық-техникалық колледжінің өндірістік оқыту шеберімін.
Білім – қоғамның іргетасын қалайтын негізгі күш. Мен тігінші мамандығы бойынша оқытушы ретінде тек кәсіби дағдыларды үйретіп қана қоймай, білім алушыларды шығармашылыққа баулу, өз ойын еркін жеткізе білуге үйрету және өз мамандығына сүйіспеншілікпен қарауға тәрбиелеу – ең басты міндетім деп санаймын. Осы мақсатта әртүрлі әдіс-тәсілдерді тиімді пайдалану менің педагогикалық жұмысымның негізін құрайды.
Оқыту әдістерін таңдау
Әрбір сабақтың мақсаты мен мазмұнына байланысты тиімді әдістерді таңдау – білім беру сапасын арттырудың негізгі факторы. Тігін пәнінде теория мен тәжірибені ұштастыру аса маңызды болғандықтан, мен дәстүрлі және инновациялық әдістерді қатар қолдануға тырысамын.
1. Практикалық оқыту әдісі
Тігіншілік – тәжірибені қажет ететін сала. Сондықтан сабақ барысында білім алушыларға дайын үлгілер бойынша жұмыс істеу, матаның түрлерін тану, эскиз сызу, лекало дайындау, тігін машинасын дұрыс пайдалану секілді нақты дағдыларды меңгертуге ерекше көңіл бөлемін.
2. Топтық жұмыс әдісі
Білім алушыларды топтарға бөліп, әр топқа жеке тапсырма беремін. Бұл әдіс олардың өзара қарым-қатынасын нығайтып, көшбасшылық қабілеттерін дамытады. Мысалы, «Әйелдерге арналған жеңіл көйлек модельдеу» тақырыбында әр топқа түрлі кезеңдерді бөліп беремін:
Бір топ эскиз дайындайды,
Екінші топ лекало жасаумен айналысады,
Үшінші топ мата таңдау, маркировка жасау және басқа да дайындық жұмыстарын жүргізеді.
Бұл әдіс командалық жұмысты дамытып, білім алушылардың бір-бірінен үйренуіне ықпал етеді.
3. Кейстік әдіс
Сабақ барысында шынайы өндірістік жағдайларды талдау әдісін қолданамын. Мысалы, білім алушыларға тігін өндірісінде жиі кездесетін ақауларды (матаның дұрыс қиылмауы, тігістің біркелкі болмауы, бұйым сапасының төмендігі және т.б.) ұсынып, оларды түзету жолдарын қарастыруды тапсырамын. Бұл тәсіл білім алушылардың аналитикалық ойлау қабілетін дамытып, мәселелерді шешу дағдысын қалыптастырады.
4. Шығармашылық шеберханасы
Әрбір білім алушының шығармашылық әлеуетін ашу үшін арнайы жобалар ұйымдастырамын. Мысалы, «Авторлық киім дизайнын жасау» тақырыбында әрбір студент өз идеясын жүзеге асырып, ерекше жұмыс түрлерін көрсетеді. Бұл олардың өзіндік стилін қалыптастыруына, қиялын дамытуына және өз қолтаңбасын қалыптастыруына ықпал етеді.
5. Техникалық құралдарды қолдану
Қазіргі заманғы технологияларды пайдалану сабақтың тиімділігін арттырады. Мен интерактивті тақтаны, презентацияларды, тігін машиналарының жаңартылған үлгілерін қолданамын. Сонымен қатар, жастардың заманауи талғамына сай киім үлгілерін әзірлеуде олардың шығармашылық қабілетін арттыруға баса назар аударамын. Білім алушыларға өз ой-қиялындағы сән үлгілерін жасауға мүмкіндік беріп, олардың жеке стилін қалыптастыруына жағдай жасаймын.
Нәтиже және рефлексия
Әрбір сабағымнан кейін өзімнің қолданған әдіс-тәсілдерімді талдап, олардың тиімділігін бағалауға тырысамын. Білім алушылардың қызығушылығы мен белсенділігі – менің әдістерімнің қаншалықты дұрыс екенін көрсетеді. Сабақ барысында әрбір студенттің жеке ерекшелігін ескеріп, олардың қабілеттерін дамытуға қолдау көрсету – менің басты қағидам.
Қорытынды
Мен үшін тігінші мамандығы – тек кәсіп үйрету ғана емес, сонымен қатар оқушылардың өмірге деген көзқарасын қалыптастыру алаңы. Тиімді әдіс-тәсілдерді қолдану арқылы мен олардың болашақта өз кәсібінің шебері болып қалыптасуына ықпал етемін. Әрбір білім алушының өз мүмкіндігін толықтай жүзеге асырып, алған білімін өмірде қолдана алатын деңгейге жетуі – менің басты мақсатым. Сондықтан, мен үнемі өз әдістерімді жетілдіріп, инновациялық тәсілдерді енгізуді маңызды деп санаймын. Әрбір оқушымның жетістігі – менің еңбегімнің жемісі.